रानामध्ये किलबिलताना
साळुंखीचा थवा
रिते रिते हात घेउनी जाऊ
कुठल्या गावा
रानफुलांचे विझले दिवे,
वाटेवरची धूळ उडे
विहिरीवर मी न्याहळत बसतो
चिरा – तडे
पांढरपेशा रानामधला फड
ऊसाचा पडला काल
आकाशातून रक्त ओकतो गोल
सूर्याचा लालेलाल
गावामधला पार देवाचा दिसतो
आता सुना सुना
भरून होती ओंजळ हिरवी, आता
उरल्या फक्त खुणा
मी पायांना सांगून थकलो;
नका थांबू उचला पाय
झळा वेढल्या गोठ्यामधली
हंबरताना तांबी गाय
कोणत्याही टिप्पण्‍या नाहीत:
टिप्पणी पोस्ट करा
काय वाटतं ... तुम्हाला ?.....!