आज तुझ्या कुशीच्या
गाभाऱ्यात
मला निवांत झोपू दे जरा.
जितके वाहू पहातायत डोळे
तितके वाहू दे जरा.
तुझी बोटे फिरू देत आज
माझ्या केसांतून
आज तुझ्या मिठीतून
मला गाढ लपेटून घे.
आईच्या पदराआड
लपणाऱ्या पोरासारखा.
आज मला काहीच विचारू नकोस.
आज मला काहीच सांगू नकोस.
मी का रडतोय म्हणून
कोलमडणार नाहीस तू
खात्री आहे मला.
फक्त झीटकारण्याचं पाप
तेवढं करू नकोस आज.
आज मला रडू दे
तुझ्या कुशीत...
माझं सारं भरलेपण
तुझ्या पदरात
रितं करू दे....
एकदाचं.
म्हणजे उद्याच्या
नव्या दुःखासाठी
मी ताजा तवाना होईन.
०९.११.२०१२
कोणत्याही टिप्पण्‍या नाहीत:
टिप्पणी पोस्ट करा
काय वाटतं ... तुम्हाला ?.....!