अस्वस्थाची डायरी .....: विठू तुझ्या भजनात

रविवार, २४ जून, २०१२

विठू तुझ्या भजनात

विठू तुझ्या भजनात
मळा नाही दंग आज
अभंगाच्या चालीवर
दुभंगला पखवाज

आभाळात नाही पाणी
ढेकळात उभा बाप
डोळियात निज नाही
ओठावर तुझा जप

कोरड्ल्या विहिरीत
कोरडला जीव
कीर्तनात - भजनात
भिजलेला देव

उरलेल्या पावसाला
आता विखाचाच विडा
तुझ्या मात्र अंगणात
अभंगांचा सडा

ओसाड गाव माझा
तिथे तल्लीन पंढरी
वारीत भिजायला
चालला वारकरी

पडला पाऊस
दूर डोंगराच्या देशी
इथे तुझ्या स्वागताला
सजलेल्या वेशी

नको होऊस आंधळा
रे गरीबाच्या देवा
पसाभर ओंजळीत
थोडे पाणी तरी ठेवा

- गजानन मुळे

कोणत्याही टिप्पण्‍या नाहीत:

टिप्पणी पोस्ट करा

काय वाटतं ... तुम्हाला ?.....!

कविता

अंतर सोलून काढावे कुणी
.....तशा या कविता .
उललेल्या अक्षरांनी
साकारतात कागदावर जाणीवेच्या .

पुन्हा पुन्हा हे उलनं ... सलनं
असतं सुरूच ...
माझ्या जगण्यातून न जगण्यापर्यंत ...
सतत पानांच्या सळसळीसारखी ही ..
खुणावत जाते कविता .

कविता ....
वाऱ्यावर ... पिसाऱ्यावर
जीव सोडून दिल्यासारखी .
लहानपणी रागाने
डाव मोडून गेल्यासारखी .
स्वतःवरच केलेल्या
असंख्य वारांच्या रुपात
शब्द शब्द होऊन ...
दाटत जाते कविता.

भर गर्दीत
सैरभैर झालेल्या
स्वतःला शोधताना ...
फाटत जाते कविता.

आता यापुढे
काहीच घडू शकणार नाही ,
मी मनसोक्त बडबडू शकणार नाही,
नि डोळे आटेपर्यंत रडूही शकणार नाही .....
माझ्या ' मी पणा'चा अर्थहीन पक्षी ...
या जाणिवांतून उडूही शकणार नाही ...
ही खंत
उरातून सल होऊन भिनताना
कोऱ्या कोऱ्या कागदावर ....
नुस्तीच आटत रहाते कविता ....

अंतर सोलून काढावे कुणी ....
.. तशा या कविता ..!!

- गजानन मुळे
( "...कधीचा इथे मी." मधून )

पृष्ठे

रविवार, २४ जून, २०१२

विठू तुझ्या भजनात

कोणत्याही टिप्पण्‍या नाहीत:

टिप्पणी पोस्ट करा